کوئٹہ: بلوچستان حکومت نے مالی سال 2026-27 کے بجٹ کی تیاری کے عمل میں سیاسی جماعتوں اور پارلیمانی نمائندوں کی مشاورت کو مرکزی حیثیت دیتے ہوئے ایک جامع اور عوام دوست بجٹ مرتب کرنے کے عزم کا اظہار کیا ہے۔
اس سلسلے میں وزیراعلیٰ بلوچستان میر سرفراز بگٹی کی زیر صدارت چیف منسٹر سیکرٹریٹ میں ایک اہم مشاورتی اجلاس منعقد ہوا، جس میں مختلف سیاسی جماعتوں کے پارلیمانی رہنماؤں نے شرکت کی۔ اجلاس کے دوران آئندہ بجٹ کے اہم خدوخال، ترقیاتی ترجیحات اور عوامی فلاح سے متعلق مختلف تجاویز کا جائزہ لیا گیا۔
شرکاء نے تعلیم، صحت، صاف پانی کی فراہمی، توانائی، مواصلات، بلدیاتی سہولیات اور بنیادی انفراسٹرکچر کی بہتری سمیت مختلف شعبوں میں عوامی ضروریات کے مطابق منصوبوں کی سفارشات پیش کیں۔ اجلاس میں اس امر پر زور دیا گیا کہ دستیاب وسائل کو ایسے منصوبوں پر خرچ کیا جائے جو عوام کی زندگیوں پر براہِ راست مثبت اثرات مرتب کریں۔
وزیراعلیٰ میر سرفراز بگٹی نے اس موقع پر کہا کہ صوبائی حکومت ایک ایسا بجٹ پیش کرنا چاہتی ہے جو ترقیاتی تقاضوں اور معاشی حقائق کے مطابق ہو اور جس سے عام شہری کو حقیقی فائدہ پہنچے۔ ان کا کہنا تھا کہ مختلف سیاسی جماعتوں اور منتخب نمائندوں کی آراء کو بجٹ سازی کے عمل میں شامل کرنا حکومت کی پالیسی کا اہم حصہ ہے۔
انہوں نے واضح کیا کہ آئندہ مالی سال میں تعلیم، صحت، روزگار کے مواقع، سماجی شعبوں کی مضبوطی اور بنیادی ڈھانچے کی ترقی کو خصوصی اہمیت دی جائے گی۔ وزیراعلیٰ کے مطابق حکومت کی کوشش ہے کہ بلوچستان کے پسماندہ اور دور دراز علاقوں کو ترقی کے عمل میں مؤثر انداز میں شامل کیا جائے تاکہ تمام اضلاع یکساں طور پر ترقی کے ثمرات حاصل کر سکیں۔
اجلاس میں شفافیت، جوابدہی اور معیار کو ترقیاتی منصوبوں کی تکمیل کے بنیادی اصول قرار دیا گیا۔ وزیراعلیٰ نے اس عزم کا اظہار کیا کہ محدود وسائل کے باوجود عوامی ریلیف اور ترقیاتی سرگرمیوں کی رفتار کو برقرار رکھنے کے لیے مؤثر اقدامات جاری رکھے جائیں گے۔
اجلاس کے اختتام پر سیاسی جماعتوں کے نمائندوں نے حکومت کی جانب سے مشاورتی عمل کو فروغ دینے کے اقدام کو مثبت قرار دیتے ہوئے بلوچستان کی ترقی اور عوامی فلاح کے لیے بھرپور تعاون کی یقین دہانی کرائی۔
Leave a Reply