مری میں لارنس کالج گھوڑا گلی کے فاؤنڈر ڈے کی تقریب شاندار انداز میں منعقد ہوئی جس میں وزیر اعلیٰ بلوچستان میر سرفراز بگٹی نے بطور مہمان خصوصی شرکت کی۔ اپنے خطاب میں انہوں نے کہا کہ لارنس کالج محض ایک تعلیمی ادارہ نہیں بلکہ ایک تاریخی اور علمی ورثہ ہے، جس نے برسوں سے ایسے باصلاحیت طلباء پیدا کیے ہیں جنہوں نے ملک و قوم کی خدمت کو اپنا مقصد بنایا۔ ان کا کہنا تھا کہ یہ ادارہ اپنے تعلیمی معیار، تربیت اور کردار سازی کے باعث پاکستان کے تعلیمی نقشے پر ایک روشن مثال ہے۔
وزیر اعلیٰ نے اپنی تعلیمی زندگی کو یاد کرتے ہوئے بتایا کہ بیکر سے مری تک کے سفر اور کالج میں گزارے گئے لمحات ان کے لیے ناقابلِ فراموش ہیں۔ انہوں نے کہا کہ یہی ادارہ ان کی علمی ترقی کا سنگِ میل ثابت ہوا اور اسی نے نظم و ضبط، قیادت اور خدمتِ وطن کے جذبے کو پروان چڑھایا۔ ان کے مطابق لارنس کالج جیسے ادارے نصابی تعلیم کے ساتھ ساتھ طلباء کی شخصیت اور کردار سازی میں بھی اہم کردار ادا کرتے ہیں اور یہی وہ مراکز ہیں جو مستقبل کے قائدین تیار کرتے ہیں۔
انہوں نے مزید کہا کہ اس ادارے کے فارغ التحصیل طلباء نے مختلف شعبوں میں نمایاں کامیابیاں حاصل کر کے ملک کا نام دنیا بھر میں روشن کیا ہے۔ تقریب کے موقع پر وزیر اعلیٰ نے کالج انتظامیہ اور اساتذہ کو مبارکباد پیش کی اور کہا کہ ایسے ادارے پاکستان کی اصل طاقت ہیں جو آنے والی نسلوں کو سنوارتے ہیں۔ انہوں نے رائیٹ ہاؤس کو ونر ہاؤس بننے پر خصوصی مبارکباد بھی دی۔ آخر میں وزیر اعلیٰ بلوچستان نے نمایاں کارکردگی دکھانے والے طلباء میں انعامات تقسیم کیے اور تقریب خوشگوار انداز میں اختتام پذیر ہوئی۔
Leave a Reply