سبی میں ایک اہم گرینڈ جرگہ منعقد ہوا جس میں گورنر بلوچستان، وزیر اعلیٰ بلوچستان، کور کمانڈر 12 کور، آئی جی ایف سی بلوچستان (نارتھ)، آئی جی پولیس بلوچستان، رکن قومی اسمبلی میاں خان بگٹی، صوبائی وزراء، چیف سیکرٹری بلوچستان اور سبی ڈویژن کے قبائلی عمائدین نے بھرپور شرکت کی۔ اس جرگے کا بنیادی مقصد صوبے کو درپیش چیلنجز کا حل تلاش کرنا، امن و امان کے قیام کو یقینی بنانا اور ترقیاتی منصوبوں کی پیش رفت کو مزید بہتر بنانا تھا۔ اس دوران قبائلی عمائدین نے اپنے علاقے کے مسائل اور تجاویز پیش کیں، جن کے فوری حل کی یقین دہانی حکومت اور سیکیورٹی اداروں کی جانب سے کرائی گئی۔
گورنر بلوچستان نے اپنے خطاب میں کہا کہ صوبے کی ترقی اور خوشحالی تمام اسٹیک ہولڈرز کے باہمی تعاون سے ہی ممکن ہے۔ انہوں نے زور دیا کہ حکومت، سیکیورٹی ادارے اور قبائلی عمائدین مل کر صوبے کو ترقی کے قومی دھارے میں شامل کریں۔ وزیر اعلیٰ بلوچستان نے بھی جرگہ سسٹم اور قبائلی روایات کی اہمیت کو اجاگر کرتے ہوئے کہا کہ حکومت عوام کے تعاون سے امن قائم رکھنے اور ترقی کو آگے بڑھانے کے لیے ہر ممکن اقدامات اٹھا رہی ہے۔
اس موقع پر کور کمانڈر 12 کور نے اس بات پر روشنی ڈالی کہ سیکیورٹی فورسز نہ صرف امن قائم رکھنے کے لیے سرگرم ہیں بلکہ نوجوانوں کے لیے مثبت مواقع فراہم کرنے میں بھی اپنا کردار ادا کریں گی۔ جرگے کے دوران کوئٹہ-ڈھاڈر (N-65) روڈ کی توسیع اور بہتری کے منصوبے کا افتتاح بھی کیا گیا جو خطے کی ٹریفک روانی اور معاشی و سماجی ترقی میں نمایاں کردار ادا کرے گا۔
جرگے کے اختتام پر تمام شرکاء نے اس عزم کا اظہار کیا کہ بلوچستان کی پائیدار ترقی کے لیے حکومت، سیکیورٹی ادارے اور قبائلی عمائدین باہمی تعاون کو مزید فروغ دیں گے۔ قبائلی رہنماؤں نے یہ بھی کہا کہ وہ نہ صرف تنازعات کے حل میں کردار ادا کریں گے بلکہ سماجی ہم آہنگی اور بھائی چارے کو فروغ دینے کے لیے بھی اپنی ذمہ داریاں نبھائیں گے۔
Leave a Reply