وزیر اعلیٰ بلوچستان میر سرفراز بگٹی نے اقلیتوں کے عالمی دن کے موقع پر چیف منسٹر سیکرٹریٹ میں منعقدہ ایک پروقار تقریب میں بطور مہمان خصوصی شرکت کی۔ تقریب میں پارلیمانی سیکرٹری برائے اقلیتی امور سنجے کمار سمیت مختلف اقلیتی برادریوں کے نمائندے موجود تھے۔ اس موقع پر وزیر اعلیٰ نے شرکاء کے ہمراہ کیک کاٹا اور ملکی سلامتی و استحکام کے لیے دعا کی۔
اپنے پیغام میں وزیر اعلیٰ نے کہا کہ اقلیتوں نے ملکی ترقی، صوبائی ہم آہنگی اور معاشرتی استحکام میں ہمیشہ نمایاں کردار ادا کیا ہے، ان کی قربانیاں اور خدمات ملک کی تاریخ کا روشن حصہ ہیں۔ انہوں نے اس عزم کا اظہار کیا کہ حکومت بلوچستان اقلیتوں کے حقوق، فلاح و بہبود اور مساوی مواقع کی فراہمی کے لیے پُرعزم ہے، صوبے میں اقلیتوں کو مکمل تحفظ، مذہبی آزادی اور ثقافتی شناخت کا احترام یقینی بنایا جا رہا ہے۔
ان کا کہنا تھا کہ حکومت نہ صرف اقلیتوں کے مسائل کے حل کے لیے سنجیدہ ہے بلکہ ترقیاتی منصوبوں میں ان کی شمولیت کو بھی ترجیح دیتی ہے۔ تقریب میں موجود اقلیتی نمائندوں نے حکومت بلوچستان کے اقدامات کو سراہتے ہوئے کہا کہ وہ صوبے میں ترقی، امن اور بھائی چارے کے فروغ کے لیے اپنا کردار ادا کرتے رہیں گے۔
Leave a Reply