وزیر اعلیٰ بلوچستان میر سرفراز بگٹی نے صوبائی وزیر میر علی حسن زہری کی دعوت پر حب کا دورہ کیا اور عوامی اجتماع سے خطاب کیا۔ اپنے خطاب میں انہوں نے علاقے کی ترقی اور عوام کی فلاح و بہبود کے لیے کئی اہم ترقیاتی منصوبوں کا اعلان کیا۔ وزیر اعلیٰ نے کہا کہ صدر آصف علی زرداری اور چیئرمین پاکستان پیپلز پارٹی بلاول بھٹو زرداری کے وژن کے مطابق بلوچستان میں صحت اور ترقی کے معیار کو بہتر بنانے کے لیے عملی اقدامات کیے جا رہے ہیں۔
انہوں نے حب کی ترقی کو حکومت کی اولین ترجیح قرار دیتے ہوئے کہا کہ حب انڈسٹریل اسٹیٹ ایک طویل عرصے سے نظرانداز رہا ہے لیکن موجودہ حکومت اس علاقے کو ترقی کی راہ پر گامزن کرے گی۔ وزیر اعلیٰ نے کہا کہ حب کی ترقی ہمارے دور میں یقینی ہوگی اور صدر زرداری کی ہدایت پر تمام اقدامات کیے جائیں گے۔
وزیر اعلیٰ بلوچستان نے حب کے لیے کئی بڑے منصوبوں کا اعلان کیا، جن میں حب ڈیولپمنٹ اتھارٹی کا قیام، حب ماسٹر پلان کی منظوری، جام غلام قادر اسپتال کو انڈس اسپتال کے سپرد کرنا، ضلعی کونسل اور ٹاؤن کمیٹی کو 25 کروڑ روپے کی فراہمی، ساکران کو تحصیل کا درجہ دینے، لوہی کو ٹاؤن کمیٹی بنانے پر غور، بے نظیر بھٹو نرسنگ کالج کا قیام، اور گڈانی سے حبکو تک 16 کلومیٹر سڑک کی تعمیر شامل ہیں۔
وزیر اعلیٰ نے اس بات کا بھی عزم ظاہر کیا کہ حب کے مزدوروں اور کسانوں کو بہتر سہولیات فراہم کی جائیں گی اور صنعتکاروں کو دعوت دی کہ وہ حب میں سرمایہ کاری کریں۔ انہوں نے کہا کہ میر علی حسن زہری جیسے مخلص نمائندے کی رہنمائی میں حب کو ایک ماڈل شہر میں تبدیل کیا جائے گا۔
قبل ازیں صوبائی وزیر میر علی حسن زہری نے اپنے خطاب میں حب کی ترقی کے لیے حکومت کی کاوشوں کو سراہا اور صدر آصف علی زرداری کی دلچسپی اور اقدامات کی تعریف کی۔ وزیر اعلیٰ نے عوام کو یقین دلایا کہ حب کو بلوچستان کا ترقی یافتہ مرکز بنایا جائے گا اور تمام ترقیاتی منصوبوں پر جلد عمل درآمد کیا جائے گا۔
Leave a Reply