وزیر اعلیٰ بلوچستان میر سرفراز بگٹی نے انسداد دہشت گردی فورس (اے ٹی ایف) کی 17ویں بیسک پاسنگ آؤٹ پریڈ کی تقریب سے خطاب کرتے ہوئے دہشت گردی کے خلاف جنگ میں بلوچستان پولیس اور اے ٹی ایف کے کردار کو بھرپور انداز میں سراہا۔ انہوں نے کہا کہ بلوچستان پولیس مشکل حالات میں اپنے فرائض انجام دے رہی ہے اور اس جنگ میں کئی بہادر افسران اور جوانوں نے اپنی جانوں کا نذرانہ پیش کیا ہے۔ یہ جنگ صرف فورسز کی نہیں بلکہ پوری قوم کی ذمہ داری ہے۔ دہشت گردی کی ہر شکل قابل مذمت ہے اور دہشت گردوں کو ان کے بلوں سے نکال کر کیفر کردار تک پہنچایا جائے گا۔
وزیر اعلیٰ نے کہا کہ دہشت گردوں کو پڑوسی ملک کی خفیہ ایجنسی “را” کی مدد حاصل ہے، جو معصوم افراد، اساتذہ، وکلاء اور تعلیمی اداروں کو نشانہ بناتی رہی ہے۔ انہوں نے قومی یکجہتی پر زور دیتے ہوئے کہا کہ دشمن کی لاحاصل جنگ کو ختم کرکے ان کے مذموم ارادوں کو خاک میں ملا دیں گے۔ انہوں نے پولیس اور اے ٹی ایف کے جوانوں کو خراج تحسین پیش کیا جو دہشت گردی کے خلاف فرنٹ لائن پر ہیں اور امن و امان کے قیام میں کلیدی کردار ادا کر رہے ہیں۔
تقریب میں وزیر اعلیٰ نے بلٹ پروف ڈائس پر خطاب کرنے سے انکار کرتے ہوئے کہا کہ جس دن تمام غازیوں کو بلٹ پروف گاڑیاں فراہم کر دوں گا، اس دن میں بھی بلٹ پروف ڈائس سے خطاب کروں گا۔ انہوں نے اے ٹی ایف اسکول کی ترقی کے لیے جدید تھرمل کیمرے فراہم کرنے، عمارت کی مرمت اور نئے بلاکس کو شہداء کے نام سے منسوب کرنے کا اعلان کیا۔ وزیر اعلیٰ نے کہا کہ شہداء ہمارے دلوں میں بستے ہیں اور ان کے خاندانوں کو تنہا نہیں چھوڑا جائے گا۔ ہر پاکستانی شہری شہداء کے لواحقین کا وارث ہے اور ان کی کفالت کرنا ہماری ذمہ داری ہے۔ بلوچستان حکومت نے سیکورٹی فورسز کے ساتھ ساتھ سویلین شہداء کے بچوں کی سولہ سالہ تعلیمی اخراجات کی ذمہ داری بھی اٹھائی ہے۔
آئی جی پولیس بلوچستان معظم جاہ انصاری نے تقریب سے خطاب کرتے ہوئے کہا کہ بلوچستان پولیس کے افسران اور جوان عوام کے جان و مال کے تحفظ کے لیے اپنی جانوں کا نذرانہ پیش کر رہے ہیں۔ انہوں نے کہا کہ اے ٹی ایف ٹریننگ اسکول فورس کے جوانوں کو انسداد دہشت گردی کے لیے جدید تربیت فراہم کر رہا ہے تاکہ دہشت گردی کے چیلنجز کا مزید بہتر انداز میں مقابلہ کیا جا سکے۔
تقریب کے دوران وزیر اعلیٰ کو پاسنگ آؤٹ پریڈ کی تقریب میں آمد پر سلامی پیش کی گئی۔ وزیر اعلیٰ نے پریڈ کا معائنہ کیا اور تربیت کے دوران بہترین کارکردگی کا مظاہرہ کرنے والے اہلکاروں میں انعامات اور تعریفی اسناد تقسیم کیں۔ وزیر اعلیٰ نے تقریب کے کامیاب انعقاد پر آئی جی پولیس بلوچستان اور کمانڈنٹ اے ٹی ایف ٹریننگ اسکول کو خراج تحسین پیش کیا اور یقین دلایا کہ پولیس کی تمام ضروریات کو جلد پورا کیا جائے گا۔ تقریب کے اختتام پر انسپکٹر جنرل پولیس بلوچستان معظم جاہ انصاری نے وزیر اعلیٰ کو یادگاری سوینئر پیش کیا۔
Leave a Reply