وزیر اعلیٰ بلوچستان میر سرفراز بگٹی نے قلات کے علاقے مغلزئی کے قریب قومی شاہراہ پر سیکیورٹی فورسز کے قافلے پر ہونے والے خودکش حملے کی شدید مذمت کی ہے۔ اپنے جاری کردہ بیان میں انہوں نے کہا کہ دہشت گردوں کی بزدلانہ کارروائیاں بلوچستان کے امن و استحکام کو متاثر نہیں کر سکتیں۔ حکومت اور سیکیورٹی فورسز صوبے میں امن و امان برقرار رکھنے کے لیے پرعزم ہیں اور اس مقصد کے لیے ہر ممکن اقدامات کیے جا رہے ہیں۔
وزیر اعلیٰ نے حملے میں شہید ہونے والے اہلکار عطا اللہ کو خراج عقیدت پیش کرتے ہوئے ان کی قربانی کو سراہا اور کہا کہ حکومت ان کے اہل خانہ کے غم میں برابر کی شریک ہے۔ انہوں نے اس عزم کا اظہار کیا کہ بلوچستان کا ہر فرد ان شہداء کی قربانیوں کا مقروض ہے اور ان کا لہو رائیگاں نہیں جائے گا۔ وزیر اعلیٰ نے حملے میں زخمی ہونے والے دیگر اہلکاروں کو فوری اور بہترین طبی سہولیات فراہم کرنے کی بھی ہدایت کی۔
انہوں نے کہا کہ سیکیورٹی فورسز کے جوانوں کی قربانیاں بلوچستان میں قیام امن اور عام آدمی کے تحفظ کے لیے ہیں اور پوری قوم ان کی بہادری اور قربانیوں کو قدر کی نگاہ سے دیکھتی ہے۔ وزیر اعلیٰ نے کہا کہ بلوچستان میں قیام امن کے لیے سیکیورٹی فورسز کی خدمات اور قربانیوں کو سلام پیش کرتے ہیں اور واضح کیا کہ صوبے میں دہشت گردوں اور ان کے سہولت کاروں کے خلاف سخت کارروائیاں جاری رہیں گی۔ انہوں نے کہا کہ حکومت کسی بھی صورت امن دشمن عناصر کو معاف نہیں کرے گی۔
وزیر اعلیٰ نے عوام سے اپیل کی کہ وہ دشمن عناصر کے عزائم کو ناکام بنانے کے لیے حکومت اور قانون نافذ کرنے والے اداروں کے ساتھ مکمل تعاون کریں۔ انہوں نے اس عزم کا اعادہ کیا کہ صوبے میں امن و امان کے لیے ہر ممکن اقدامات کیے جائیں گے اور دہشت گردوں کے ناپاک عزائم کو ہر صورت ناکام بنایا جائے گا۔
Leave a Reply