کوئٹہ میں وزیراعلیٰ بلوچستان میر سرفراز بگٹی کی زیر صدارت ایک اہم اجلاس منعقد ہوا، جس میں صفا کوئٹہ پروگرام کے تحت جاری اقدامات اور مستقبل کے لائحہ عمل کا جائزہ لیا گیا۔ اجلاس میں شہر کی صفائی، نکاسی آب، تجاوزات کے خاتمے اور مجموعی خوبصورتی سے متعلق اہم فیصلے کیے گئے۔ اجلاس کا انعقاد چیف منسٹر سیکرٹریٹ میں ہوا، جس میں چیف سیکرٹری بلوچستان شکیل قادر خان، ایڈیشنل چیف سیکرٹری ترقیات و منصوبہ بندی حافظ عبدالباسط، پرنسپل سیکرٹری بابر خان، سیکرٹری خزانہ عمران زرکون، کمشنر کوئٹہ ڈویژن حمزہ شفقات، پبلک پرائیویٹ پارٹنرشپ اتھارٹی کے سربراہ ڈاکٹر فیصل خان، میٹروپولیٹن کارپوریشن اور دیگر محکموں کے اعلیٰ افسران شریک ہوئے۔
اجلاس میں فیصلہ کیا گیا کہ شہر بھر میں تجاوزات کے خلاف بھرپور آپریشن کیا جائے گا، اور میونسپل قوانین پر عملدرآمد کو یقینی بنانے کے لیے مجسٹریٹس کی تقرری عمل میں لائی جائے گی۔ کمشنر کوئٹہ حمزہ شفقات نے اجلاس کو بتایا کہ سرکاری زمینوں، املاک اور دیگر پراپرٹیز پر قبضے کی مکمل نشاندہی کر لی گئی ہے اور ان کے خلاف کارروائی کا آغاز کر دیا گیا ہے۔
وزیراعلیٰ نے ہدایت کی کہ صفا کوئٹہ پروگرام کے تحت جاری صفائی مہم کو مزید فعال اور مؤثر بنایا جائے، اور تجاوزات کے خلاف مہم کو بغیر کسی دباو، سفارش یا رعایت کے مکمل کیا جائے۔ انہوں نے واضح کیا کہ تجاوزات شہریوں کی روزمرہ زندگی میں رکاوٹ کا باعث ہیں، اور حکومت اس مسئلے پر کوئی نرمی برتنے کا ارادہ نہیں رکھتی۔
وزیراعلیٰ نے متعلقہ اداروں کو ہدایت دی کہ صفائی، نکاسی آب، اور ٹریفک کے مسائل کے مستقل حل کے لیے سنجیدہ اقدامات کیے جائیں اور شہر کی خوبصورتی کے لیے عملی اقدامات کو ترجیح دی جائے۔ ان کا کہنا تھا کہ کوئٹہ کو جدید شہری سہولیات سے آراستہ ایک ماڈل سٹی بنانے کے لیے تیز رفتار اور ہنگامی بنیادوں پر کام جاری ہے۔
اجلاس میں اس بات پر زور دیا گیا کہ عوام کی شرکت کے بغیر یہ مہم پائیدار ثابت نہیں ہو سکتی، لہٰذا شہریوں میں شعور بیدار کرنے کے لیے وسیع پیمانے پر آگاہی مہم شروع کی جائے۔ وزیراعلیٰ نے کہا کہ عوام کو سہولیات فراہم کرنا حکومت کی اولین ترجیح ہے اور شہریوں کے تعاون سے کوئٹہ کو ایک مثالی اور خوبصورت شہر میں تبدیل کیا جائے گا۔
شرکاء نے اس بات پر اتفاق کیا کہ صفا کوئٹہ پروگرام کوئی وقتی منصوبہ نہیں بلکہ شہر میں مستقل بہتری کے لیے ایک طویل المدتی حکمت عملی ہے، جس کا مقصد شہری زندگی کو سہل، منظم اور خوشگوار بنانا ہے۔
Leave a Reply