یومِ یکجہتی کشمیر ہر سال اس عزم کے ساتھ منایا جاتا ہے کہ کشمیری عوام کی جدوجہدِ آزادی میں پاکستان ان کے ساتھ کھڑا ہے۔ وزیر اعلیٰ بلوچستان میر سرفراز بگٹی نے اس موقع پر اپنے پیغام میں کہا کہ کشمیری عوام کئی دہائیوں سے بھارت کے غاصبانہ قبضے کے خلاف برسرِپیکار ہیں اور حقِ خودارادیت کے لیے بے شمار قربانیاں دے چکے ہیں۔ ہزاروں کشمیریوں نے اپنی جانوں کا نذرانہ پیش کیا، لیکن بھارت کی ظالمانہ پالیسیوں کے باوجود ان کا حوصلہ کمزور نہیں ہوا۔
مسئلہ کشمیر جنوبی ایشیا میں دیرپا امن کے قیام میں سب سے بڑی رکاوٹ ہے۔ پاکستان اور بھارت کے درمیان یہ بنیادی تنازعہ نہ صرف دونوں ممالک کے تعلقات کو متاثر کرتا ہے بلکہ پورے خطے کے استحکام پر بھی اثر انداز ہوتا ہے۔ کشمیری عوام کی خواہشات کے مطابق اس مسئلے کا حل ناگزیر ہے کیونکہ طاقت کے بل پر کسی قوم کی آزادی کو دبایا نہیں جا سکتا۔ بھارت نے مقبوضہ کشمیر میں انسانی حقوق کی پامالیوں کا بازار گرم کر رکھا ہے، اور کشمیری عوام کو بنیادی حقوق سے محروم کر دیا گیا ہے، لیکن ظلم کی سیاہ رات زیادہ دیر تک نہیں رہ سکتی۔
وزیر اعلیٰ بلوچستان نے عالمی برادری سے مطالبہ کیا کہ وہ بھارت کے مظالم کا نوٹس لے اور اقوامِ متحدہ کی قراردادوں کے مطابق کشمیری عوام کو ان کا حقِ خودارادیت دلانے میں اپنا کردار ادا کرے۔ پاکستان ہمیشہ کشمیری عوام کی سفارتی، اخلاقی اور سیاسی حمایت جاری رکھے گا کیونکہ پاکستانی قوم کے دل اپنے کشمیری بھائیوں کے ساتھ دھڑکتے ہیں۔ بلوچستان کے عوام بھی کشمیریوں کے ساتھ مکمل یکجہتی کا اظہار کرتے ہیں اور ان کے حق میں آواز بلند کرنے میں کسی سے پیچھے نہیں۔
یہ ایک حقیقت ہے کہ آزادی کی جدوجہد کبھی رائیگاں نہیں جاتی۔ کشمیری عوام کی قربانیاں ضرور رنگ لائیں گی، اور وہ دن دور نہیں جب مقبوضہ کشمیر بھارتی تسلط سے آزاد ہو کر ایک آزاد ریاست کے طور پر دنیا کے نقشے پر ابھرے گا۔
Leave a Reply