بلوچستان میں اعلیٰ تعلیمی سہولیات کی فراہمی کو یقینی بنانے کے لیے وزیر اعلیٰ بلوچستان میر سرفراز بگٹی کی قیادت میں صوبائی حکومت نے ایک اور اہم سنگ میل عبور کر لیا ہے۔ بلوچستان کابینہ کی منظوری کے بعد، گورنر بلوچستان و چانسلر پبلک سیکٹر یونیورسٹیز کی جانب سے میر غلام قادر بگٹی سب کیمپس آف میر چاکر خان رند یونیورسٹی ایٹ سوئی کے قیام کا باضابطہ نوٹیفکیشن جاری کر دیا گیا ہے۔ یہ سب کیمپس بلوچستان یونیورسٹیز ایکٹ 2022 کے تحت قائم کردہ وائس چانسلرز کمیٹی کی سفارشات اور حکومت بلوچستان (صوبائی کابینہ) کی منظوری کے بعد عمل میں آیا ہے اور فوری طور پر نافذ العمل ہوگا۔
اس فیصلے کے تحت، میر چاکر خان رند یونیورسٹی سبی کا نیا سب کیمپس سوئی میں قائم کیا جائے گا، جس سے علاقے کے طلبہ کو اعلیٰ تعلیم کے بہترین مواقع میسر آئیں گے۔ وزیر اعلیٰ بلوچستان میر سرفراز بگٹی کی قیادت میں صوبائی حکومت تعلیمی ترقی کے لیے انقلابی اقدامات کر رہی ہے تاکہ بلوچستان کے نوجوانوں کو معیاری اور جدید تعلیم ان کے اپنے علاقوں میں دستیاب ہو سکے۔ اس اقدام کا مقصد صوبے میں تعلیمی ترقی کو فروغ دینا، جدید تعلیمی سہولیات کو مزید وسعت دینا، اور مقامی طلبہ کے لیے معیاری تعلیمی مواقع کی فراہمی کو یقینی بنانا ہے۔
مزید برآں، میر چاکر خان رند یونیورسٹی سبی کے وائس چانسلر کو ہدایت دی گئی ہے کہ وہ نئے قائم ہونے والے سب کیمپس کی ہائر ایجوکیشن کمیشن (HEC) سے منظوری اور یہاں سے جاری ہونے والی ڈگریوں کی باقاعدہ تسلیم شدگی کے لیے ضروری اقدامات کریں۔ وزیر اعلیٰ بلوچستان میر سرفراز بگٹی کے تعلیم دوست وژن کے تحت، صوبائی حکومت مزید ایسے منصوبوں پر کام کر رہی ہے جو بلوچستان میں اعلیٰ تعلیمی اداروں کی تعداد میں اضافے اور تعلیمی سہولیات کی بہتری کو یقینی بنائیں گے۔
یہ اقدام نہ صرف بلوچستان کے نوجوانوں کو بہتر تعلیمی مواقع فراہم کرے گا بلکہ صوبے میں ترقی اور خوشحالی کے ایک نئے دور کا آغاز بھی ہوگا۔ میر غلام قادر بگٹی سب کیمپس کا قیام بلوچستان کے تعلیمی شعبے میں ایک نمایاں پیش رفت ہے، جو مستقبل میں علم و ترقی کی راہیں ہموار کرے گا اور مقامی طلبہ کو اعلیٰ تعلیم کے لیے در بدر بھٹکنے کے بجائے اپنے علاقے میں ہی بہترین مواقع فراہم کرے گا۔
Leave a Reply