کوئٹہ: حکومت بلوچستان نے زراعت کے شعبے کی ترقی اور کسانوں کی فلاح و بہبود کے لیے بے نظیر کسان کارڈ متعارف کرانے کا فیصلہ کیا ہے۔ وزیر اعلیٰ بلوچستان میر سرفراز بگٹی نے محکمہ زراعت کی سمری پر کسان کارڈ کی منظوری دے دی ہے۔ ترجمان صوبائی حکومت شاہد رند کے مطابق، کسان کارڈ کے تحت بلوچستان کے چھوٹے زمینداروں کو سبسڈی فراہم کی جائے گی تاکہ وہ اپنی زرعی پیداوار کو بہتر بنا سکیں اور جدید ٹیکنالوجی کا فائدہ اٹھا سکیں۔
وزیر اعلیٰ بلوچستان میر سرفراز بگٹی نے اس منصوبے کے پہلے مرحلے کی منظوری دے دی ہے، جس میں محکمہ انفارمیشن ٹیکنالوجی کو دو سال کے لیے کلاؤڈ سسٹم قائم کرنے کی ذمہ داری سونپی گئی ہے تاکہ کسانوں کو اس کارڈ کے ذریعے بہتر سہولتیں فراہم کی جا سکیں۔
کسان کارڈ کا یہ منصوبہ صدر آصف علی زرداری اور وزیر اعظم محمد شہباز شریف کے کسان دوست وژن کا حصہ ہے، جو کہ کسانوں کے لیے ایک طویل مدتی اور پائیدار حکمت عملی پر مبنی ہے۔ اس سلسلے میں چئیرمین پاکستان پیپلز پارٹی بلاول بھٹو زرداری نے سندھ اور بلوچستان کے ہاریوں کی بہبود کے لیے جامع حکمت عملی تیار کرنے کی ہدایت کی ہے۔
کسان کارڈ کا پہلا مرحلہ بلوچستان حکومت اپنے وسائل سے شروع کر رہی ہے، جب کہ دوسرے مرحلے میں وفاقی حکومت سے معاونت حاصل کی جائے گی تاکہ اس منصوبے کو مزید وسعت دی جا سکے اور اس سے پورے بلوچستان کے کسانوں کو فائدہ پہنچ سکے۔ اس اقدام سے نہ صرف بلوچستان کے زرعی شعبے میں بہتری آئے گی بلکہ کسانوں کی اقتصادی حالت میں بھی بہتری کی توقع ہے۔
اس منصوبے سے بلوچستان کے کسانوں کو جدید سہولتوں کے ساتھ ساتھ معاشی استحکام حاصل ہوگا اور اس کے ذریعے پورے علاقے میں زرعی ترقی کی نئی راہیں کھلیں گی۔
Leave a Reply