بلوچستان کے ہونہار طلبہ کے لیے فلی فنڈڈ اسکالرشپ، داخلہ ٹیسٹ 21 فروری کو ہوگا

حکومت بلوچستان اور صادق پبلک اسکول بہاولپور کے اشتراک سے بلوچستان ایجوکیشن انڈومنٹ فنڈ (بیف) کے تحت بلوچستان کے پسماندہ اضلاع کے ہونہار طلبہ و طالبات کے لیے فلی فنڈڈ اسکالرشپ کا اعلان کر دیا گیا ہے۔ اس اسکالرشپ کے تحت منتخب طلبہ کو حکومت بلوچستان کے اخراجات پر معیاری تعلیمی سہولیات فراہم کی جائیں گی۔ بلوچستان ایجوکیشن انڈومنٹ فنڈ (بیف) حکام کے اعلامیہ کے مطابق اس اسکالرشپ پروگرام کے لیے داخلہ ٹیسٹ 21 فروری 2025 کو دبئی محل میرج ہال، نیو سبزل روڈ (سی پیک روڈ) کوئٹہ میں منعقد ہوگا۔ تمام اہل طلبہ و طالبات کو رول نمبر ایس ایم ایس کے ذریعے بھیجا جائے گا اور فون کے ذریعے بھی مطلع کیا جائے گا، جبکہ فہرست فیس بک اور ویب سائٹ پر بھی اپلوڈ کی جائے گی۔ بیف اعلامیہ میں واضح کیا گیا ہے کہ کےجی اور نرسری کے بچوں کا ٹیسٹ نہیں ہوگا، انہیں بعد میں انٹرویو کے لیے بلایا جائے گا۔ والدین اور طلبہ کو ہدایت دی گئی ہے کہ وہ بروقت ٹیسٹ میں شرکت کو یقینی بنائیں تاکہ اس موقع سے بھرپور فائدہ اٹھایا جا سکے۔