وزیر اعلیٰ بلوچستان میر سرفراز بگٹی نے عیدالاضحٰی اپنے آبائی علاقے بیکڑ، ضلع ڈیرہ بگٹی میں سادگی اور روایتی جوش و جذبے کے ساتھ منائی۔ انہوں نے عید کی نماز ادا کرنے کے بعد پاکستان ہاؤس بیکڑ میں عوام سے ملاقات کی، ان کے ساتھ عید کی خوشیاں بانٹیں اور روایتی بلوچی انداز میں حال احوال کیا۔ اس موقع پر پاکستان ہاؤس میں ایک عوامی اجتماع کا اہتمام کیا گیا جس میں بڑی تعداد میں شہریوں، سیاسی و سماجی شخصیات، قبائلی عمائدین، نوجوانوں اور بزرگوں نے شرکت کی۔
وزیر اعلیٰ نے فرداً فرداً لوگوں سے ملاقات کی، ان کے مسائل سنے اور فوری حل کے لیے موقع پر موجود ضلعی انتظامیہ کو احکامات جاری کیے۔ اپنے خطاب میں میر سرفراز بگٹی نے کہا کہ بلوچستان کے عوام ان کے دل کے قریب ہیں اور وہ چاہتے ہیں کہ عوام کے تمام مسائل مقامی سطح پر ہی حل ہوں تاکہ عام آدمی کو خوشحالی نصیب ہو۔ انہوں نے واضح کیا کہ حکومت کا اصل کام عوام کی خدمت ہے اور وہ ہر موقع پر عوام کے ساتھ کھڑے ہیں۔
انہوں نے کہا کہ عید کا دن بھائی چارے، محبت اور یکجہتی کا پیغام دیتا ہے، اس لیے ہمیں چاہیے کہ ہم اپنے اردگرد موجود مستحق افراد کو بھی اپنی خوشیوں میں شریک کریں تاکہ یہ خوشی سب کے لیے یکساں ہو۔ وزیر اعلیٰ نے بچوں میں عیدی بھی تقسیم کی اور بزرگوں سے دعائیں لیں۔
اس موقع پر عوام نے وزیر اعلیٰ کو اپنے مقامی مسائل سے بھی آگاہ کیا جن میں پینے کے صاف پانی کی کمی، بجلی کے مسائل، سڑکوں کی خستہ حالی، تعلیمی اداروں کی بہتری اور صحت کی سہولیات کا فقدان شامل تھے۔ میر سرفراز بگٹی نے ان مسائل کو ترجیحی بنیادوں پر حل کرنے کی یقین دہانی کرواتے ہوئے موقع پر ہی متعلقہ حکام کو ہدایات جاری کیں۔
انہوں نے کہا کہ ان کی حکومت ہر اس فرد کے دروازے پر خود جائے گی جسے ریاست کی مدد درکار ہے۔ انہوں نے یقین دہانی کرائی کہ موجودہ صوبائی حکومت عوامی مفاد کو ہر فیصلے میں مقدم رکھتی ہے اور شفافیت، میرٹ اور مؤثر حکمرانی کے اصولوں پر کاربند ہے۔ ان کا کہنا تھا کہ وہ ایک ایسا بلوچستان دیکھنا چاہتے ہیں جہاں ہر شہری کو بنیادی سہولیات، معیاری تعلیم، بہترین صحت کی سہولیات اور روزگار کے مساوی مواقع حاصل ہوں۔
وزیر اعلیٰ نے کہا کہ عوام کا اعتماد ہی حکومت کی اصل طاقت ہے اور ان کی پالیسیوں کا محور صرف اور صرف عوام کی خدمت اور ان کی زندگیوں میں بہتری لانا ہے۔
Leave a Reply