وزیر اعلیٰ بلوچستان میر سرفراز بگٹی کی قیادت میں حکومت بلوچستان اور پاکستان پیٹرولیم لمیٹڈ (پی پی ایل) کے درمیان ایک تاریخی معاہدہ طے پایا ہے، جو سوئی اور بلوچستان کے عوام کے لیے ترقی، تعلیم اور روزگار کے بے شمار مواقع فراہم کرے گا۔ اس معاہدے کے تحت بلوچستان کے نوجوانوں کو معیاری تعلیم، جدید مہارتوں اور روزگار کے بہتر مواقع فراہم کیے جائیں گے۔ پی پی ایل ہر سال 50 طلبہ کو لارنس کالج اور کیڈٹ کالج حسن ابدال میں اسکالرشپ فراہم کرے گا، جبکہ مقامی سطح پر 14 ڈپلومہ ہولڈرز اور 7 انجینئرز کو مکمل میرٹ پر بھرتی کیا جائے گا۔ اس کے علاوہ، اسکل ڈیولپمنٹ پروگرام کے تحت 50 نوجوانوں کو ہر سال بیرون ملک ملازمت کے لیے تربیت دی جائے گی، جو بلوچستان کے نوجوانوں کے لیے ایک انقلابی قدم ثابت ہوگا۔
بنیادی ڈھانچے کی ترقی کے حوالے سے بھی یہ معاہدہ انتہائی اہمیت کا حامل ہے۔ وزیر اعلیٰ بلوچستان میر سرفراز بگٹی کی خصوصی ہدایت پر سوئی ماڈل سٹی منصوبے کا آغاز کیا جا رہا ہے، جس کے تحت سڑکوں، سیوریج، اسٹریٹ لائٹس، پارکس اور دیگر جدید سہولیات کی فراہمی یقینی بنائی جائے گی۔ اس کے ساتھ ساتھ، سوئی کے عوام کو روزانہ 10 لاکھ گیلن صاف پانی کی فراہمی کا منصوبہ بھی اس معاہدے کا حصہ ہے۔ مزید برآں، سوئی میں ایک جدید میڈیکل کالج اور یونیورسٹی کے قیام کے لیے وفاقی حکومت سے تعاون حاصل کرنے کی درخواست کی گئی ہے، تاکہ بلوچستان کے نوجوانوں کو اپنے ہی صوبے میں اعلیٰ تعلیم کے بہترین مواقع میسر آسکیں۔
وزیر اعلیٰ بلوچستان میر سرفراز بگٹی نے ماحولیاتی بہتری کے لیے بھی خصوصی اقدامات کی ہدایت کی ہے، جن کے تحت گیس فلیئرنگ کے مقام کو 10 کلومیٹر دور منتقل کیا جائے گا، تاکہ مقامی آبادی کو ہونے والے ماحولیاتی نقصانات کا ازالہ کیا جا سکے۔ پی پی ایل ڈیرہ بگٹی کی تمام پرانی سرکاری عمارتوں کی تزئین و آرائش کرے گا اور انہیں جدید سہولیات سے آراستہ کیا جائے گا، تاکہ علاقے کے عوام کو بنیادی سہولتوں تک آسان رسائی حاصل ہو۔
حکومت بلوچستان اور پی پی ایل کے اس معاہدے میں میرٹ اور شفافیت کو اولین ترجیح دی گئی ہے۔ وزیر اعلیٰ میر سرفراز بگٹی نے واضح کیا ہے کہ پی پی ایل میں تمام بھرتیاں مکمل طور پر میرٹ پر ہوں گی اور کسی بھی قسم کی سفارش یا اقربا پروری قابل قبول نہیں ہوگی۔ مزید برآں، طویل عرصے سے نوکری کے منتظر ریٹائرڈ ملازمین کی جلد از جلد بھرتی کو یقینی بنانے کے لیے بھی اقدامات کیے جا رہے ہیں۔
یہ معاہدہ بلوچستان کی ترقی میں ایک نئے دور کا آغاز ثابت ہوگا اور وزیر اعلیٰ بلوچستان میر سرفراز بگٹی کے وژن کے مطابق صوبے میں تعلیم، روزگار، بنیادی ڈھانچے اور ماحولیاتی بہتری کے لیے ایک ٹھوس بنیاد فراہم کرے گا۔ بلوچستان کے عوام اس تاریخی اقدام سے براہ راست مستفید ہوں گے، جو صوبے کی مجموعی ترقی اور خوشحالی میں اہم کردار ادا کرے گا۔
Leave a Reply