وزیر اعلیٰ بلوچستان میر سرفراز بگٹی کی ہدایت پر محکمہ تعلیم بلوچستان نے امتحانات میں نقل کے خاتمے کے لیے ایک مؤثر ایگزیکٹو آرڈر جاری کیا ہے، جس کا اطلاق 11 فروری 2025 سے ہونے والے میٹرک کے امتحانات پر ہوگا۔ اس اقدام کا مقصد صوبے میں تعلیمی معیار کو بہتر بنانا اور طلبہ میں دیانت داری اور محنت کے اصولوں کو فروغ دینا ہے۔
حکومت بلوچستان کی جانب سے جاری کردہ اعلامیے میں واضح کیا گیا ہے کہ امتحانات کے دوران کسی بھی قسم کی نقل اور غیر قانونی ذرائع کے استعمال کی سختی سے ممانعت ہوگی۔ طلبہ کو تنبیہ کی گئی ہے کہ اگر کسی کو نقل کرتے ہوئے پکڑا گیا تو اس کے خلاف سخت کارروائی کی جائے گی۔ والدین سے بھی اپیل کی گئی ہے کہ وہ اپنے بچوں کی حوصلہ افزائی کریں کہ وہ ایمانداری کے ساتھ اپنی قابلیت پر انحصار کریں۔
اعلامیے میں کہا گیا ہے کہ امتحانی نظام کو شفاف اور منصفانہ بنانے کے لیے جدید نگرانی کے طریقے اپنائے جائیں گے، تاکہ نقل کے امکانات کو کم سے کم کیا جا سکے۔ کسی بھی طالب علم یا امتحانی عملے کی جانب سے قوانین کی خلاف ورزی کو برداشت نہیں کیا جائے گا اور خلاف ورزی کے مرتکب افراد کے خلاف سخت قانونی کارروائی عمل میں لائی جائے گی۔
طلبہ کو پیغام دیا گیا ہے کہ دیانت داری کے ساتھ امتحانات میں شرکت کرنا نہ صرف ان کی ذاتی کامیابی کے لیے اہم ہے بلکہ یہ روشن مستقبل کی بنیاد بھی رکھتا ہے۔ حکومت بلوچستان کا عزم ہے کہ صوبے میں تعلیمی اصلاحات کے ذریعے ایک شفاف اور معیاری نظام تعلیم کو فروغ دیا جائے، جہاں محنت اور قابلیت ہی کامیابی کا اصل معیار ہو۔
آئیں! ہم سب مل کر نقل کے خاتمے کے لیے حکومتی اقدامات کا ساتھ دیں اور ایک روشن مستقبل کی بنیاد رکھیں۔ کیونکہ دیانت داری کے ساتھ حاصل کی گئی کامیابی ہی حقیقی کامیابی ہے۔
Leave a Reply