حب میں وزیر اعلیٰ بلوچستان میر سرفراز بگٹی سے چیمبرز آف کامرس کے صدر اسماعیل ستار کی قیادت میں صنعتکاروں نے ملاقات کی، جس میں سینیٹر میر عبدالقدوس بزنجو اور صوبائی وزیر میر علی حسن زہری بھی شریک تھے۔ اس ملاقات کے دوران صنعتکاروں نے وزیر اعلیٰ کو اپنے مسائل اور حب انڈسٹریل اسٹیٹ کی ضروریات سے آگاہ کیا۔
وزیر اعلیٰ بلوچستان نے فوری طور پر حب انڈسٹریل اسٹیٹ کو پانی کی فراہمی کا حکم دیا اور سیکورٹی کے حوالے سے موثر اقدامات کی یقین دہانی کروائی۔ انہوں نے کہا کہ حکومت حب میں صنعتی ترقی کے لیے بھرپور تعاون کرے گی اور صنعتی زونز میں سازگار ماحول کی فراہمی کو اپنی اولین ترجیح قرار دیا۔
میر سرفراز بگٹی نے مزید کہا کہ صدر مملکت آصف علی زرداری بلوچستان میں صنعتکاری کے فروغ میں گہری دلچسپی رکھتے ہیں اور ان کی ہدایات پر حب کو بلوچستان کا صنعتی مرکز بنانے کے لیے اقدامات جاری ہیں۔ انہوں نے صنعتکاروں کو ہر ممکن سہولیات فراہم کرنے کا یقین دلایا تاکہ حب کو ترقی کی راہ پر گامزن کیا جا سکے۔
وزیر اعلیٰ نے اس موقع پر صنعتکاروں کو درپیش چیلنجز پر تفصیلی گفتگو کی اور ان کے حل کے لیے فوری اقدامات اٹھانے کا عزم ظاہر کیا۔ انہوں نے کہا کہ حب کی صنعتی ترقی بلوچستان کی معیشت کو مضبوط کرنے میں اہم کردار ادا کرے گی اور حکومت اس حوالے سے ہر ممکن وسائل فراہم کرے گی۔
Leave a Reply