وزیر اعلیٰ بلوچستان میر سرفراز بگٹی نے قلات اور ہرنائی میں سیکیورٹی فورسز کی کامیاب کارروائیوں کو سراہتے ہوئے قلات کے علاقے منگچر میں دہشت گردی کے حالیہ واقعے کی شدید مذمت کی ہے۔ اپنے بیان میں انہوں نے کہا کہ سیکیورٹی فورسز نے بروقت اور مؤثر ردعمل دیتے ہوئے ملک دشمن عناصر کے مذموم عزائم کو ناکام بنایا۔ گزشتہ چوبیس گھنٹوں میں 23 دہشت گردوں کو جہنم واصل کیا گیا، جو فورسز کی بہادری اور پیشہ ورانہ مہارت کا واضح ثبوت ہے۔
وزیر اعلیٰ نے شہداء کو خراج عقیدت پیش کرتے ہوئے کہا کہ بہادر جوانوں نے اپنی جانوں کا نذرانہ دے کر مادرِ وطن کا دفاع کیا، ان کی قربانیاں ہمیشہ یاد رکھی جائیں گی۔ انہوں نے شہداء کے اہل خانہ سے تعزیت کا اظہار کرتے ہوئے یقین دلایا کہ حکومت انہیں کسی صورت تنہا نہیں چھوڑے گی اور شہداء کے بچوں اور لواحقین کی مکمل کفالت کرے گی۔
میر سرفراز بگٹی نے واضح کیا کہ ہرنائی، قلات اور بلوچستان کے دیگر علاقوں میں سیکیورٹی فورسز کا کلیئرنس آپریشن پوری قوت سے جاری ہے، اور جب تک آخری دہشت گرد کا مکمل خاتمہ نہیں ہو جاتا، یہ کارروائیاں جاری رہیں گی۔ ان کا کہنا تھا کہ بلوچستان میں دہشت گردوں اور ان کے سہولت کاروں کے لیے کوئی جگہ نہیں، دشمن قوتیں صوبے کی ترقی اور خوشحالی کو سبوتاژ کرنا چاہتی ہیں، مگر ہماری بہادر فورسز اور عوام ان کے ناپاک عزائم کو کبھی کامیاب نہیں ہونے دیں گے۔
انہوں نے دوٹوک الفاظ میں کہا کہ بلوچستان میں امن و امان کی بحالی حکومت کی اولین ترجیح ہے اور کسی بھی قیمت پر دہشت گردی کے مکمل خاتمے تک پیچھے نہیں ہٹیں گے۔ وزیر اعلیٰ نے اس عزم کا اعادہ کیا کہ بلوچستان کی سرزمین کو دہشت گردوں سے مکمل پاک کر کے اسے ترقی اور خوشحالی کی راہ پر گامزن کیا جائے گا۔
Leave a Reply