بلوچستان حکومت نے صوبے میں دہشت گردی سے نمٹنے کے لیے بلوچستان لیویز فورس کے تحت ایک خصوصی انسداد دہشت گردی ونگ قائم کرنے کا اعلان کیا ہے۔ ڈائریکٹر جنرل بلوچستان لیویز فورس، عبدالغفار مگسی نے پیر کے روز اس ونگ کے قیام کا باضابطہ اعلان کرتے ہوئے کہا کہ اس کا مقصد لیویز فورس کی صلاحیتوں میں اضافہ کرنا اور دہشت گردی کے خلاف کارروائیوں کو مزید مؤثر بنانا ہے۔
انہوں نے کہا کہ نیا ونگ دیگر سیکیورٹی فورسز اور ایجنسیوں کے ساتھ قریبی تعاون کو یقینی بنائے گا، تاکہ بلوچستان میں امن و امان کی صورت حال کو مزید مستحکم کیا جا سکے۔ انہوں نے مزید کہا کہ اس ونگ کے قیام سے لیویز فورس کی آپریشنل صلاحیت میں نمایاں اضافہ ہوگا اور سیکیورٹی اداروں کے درمیان ہم آہنگی کو فروغ ملے گا۔
انسداد دہشت گردی ونگ کو جدید اسلحہ، آلات اور خصوصی تربیت فراہم کی جائے گی تاکہ وہ دہشت گردوں کے نیٹ ورکس کو ختم کرنے اور بلوچستان میں سیکیورٹی کی صورتحال کو مستحکم کرنے میں مؤثر کردار ادا کر سکے۔ حکام کے مطابق، اس فیصلے کا پس منظر کچھ حالیہ واقعات ہیں، جن میں لیویز فورس کے اہلکاروں پر حملے کیے گئے اور ان کے ہتھیار چھین لیے گئے۔ ان واقعات کا سخت نوٹس لیتے ہوئے ڈی جی لیویز نے فورس میں انسداد دہشت گردی ونگ کے قیام کا فیصلہ کیا ہے۔
ڈی جی لیویز فورس نے اس عزم کا اظہار کیا کہ تمام دستیاب وسائل اور صلاحیتوں کو بروئے کار لاتے ہوئے دہشت گردی کے خلاف جنگ جاری رکھی جائے گی اور بلوچستان کے عوام کے لیے امن کو یقینی بنایا جائے گا۔ یہ ونگ مستقبل میں دہشت گردی کے خلاف کارروائیوں میں ایک اہم کردار ادا کرے گا اور صوبے کی سیکیورٹی کو مزید مضبوط بنانے میں مدد فراہم کرے گا۔
Leave a Reply