وزیر اعلیٰ بلوچستان میر سرفراز بگٹی کی صدارت میں منگل کے روز چیف منسٹر سیکرٹریٹ میں صوبائی اپیکس کمیٹی کا اجلاس منعقد ہوا، جس میں کمانڈر بلوچستان کور لیفٹیننٹ جنرل راحت نسیم احمد خان، چیف سیکرٹری بلوچستان شکیل قادر خان، آئی جی پولیس سمیت دیگر اعلیٰ حکام نے شرکت کی۔ اجلاس میں صوبے میں امن و امان کی مجموعی صورتحال، انسداد دہشت گردی کے اقدامات اور سیکیورٹی فورسز کی کارکردگی کا تفصیلی جائزہ لیا گیا۔ اس دوران قومی اور صوبائی سطح پر ہونے والے گذشتہ اپیکس کمیٹی اجلاسوں کے فیصلوں پر عملدرآمد کی پیش رفت کا بھی جائزہ لیا گیا۔
اجلاس میں دہشت گردی کے خاتمے کے لیے سخت اقدامات پر زور دیا گیا اور انٹیلی جنس شیئرنگ کو مزید مؤثر بنانے پر اتفاق کیا گیا۔ وزیر اعلیٰ بلوچستان میر سرفراز بگٹی نے اس موقع پر کہا کہ صوبے میں قیام امن کے لیے تمام ادارے ایک پیج پر ہیں اور عوام کے جان و مال کے تحفظ کو یقینی بنانے کے لیے کوئی کسر نہیں چھوڑی جائے گی۔ اجلاس میں بارڈر مینجمنٹ، اسمگلنگ کی روک تھام اور نیشنل ایکشن پلان کے تحت کیے جانے والے اقدامات پر بھی غور کیا گیا۔
اجلاس میں اس بات پر بھی زور دیا گیا کہ بلوچستان میں دیرپا امن کے قیام کے لیے سیکیورٹی فورسز اور سول انتظامیہ کے درمیان قریبی رابطہ ضروری ہے۔ وزیر اعلیٰ نے اجلاس میں کیے گئے فیصلوں پر فوری عملدرآمد کی ہدایت دیتے ہوئے کہا کہ عوام کے جان و مال کے تحفظ اور ترقیاتی منصوبوں کے تسلسل کو یقینی بنانے کے لیے حکومت ہر ممکن اقدامات کرے گی۔
Leave a Reply