کوئٹہ میں منگل کے روز ایک اہم سیمینار کا انعقاد کیا گیا جس کا مقصد صوبے میں بین المذاہب ہم آہنگی اور قومی اتحاد کے فروغ کے لیے اقدامات کو اجاگر کرنا تھا۔ اس موقع پر وزیر اعلیٰ بلوچستان میر سرفراز بگٹی، گورنر بلوچستان شیخ جعفر خان مندوخیل، کمانڈر بلوچستان کور لیفٹیننٹ جنرل راحت نسیم احمد خان، سینیٹر دنیش کمار، ایم این اے رمیش لال، ایم این اے درشن لال، صوبائی وزراء، اراکین اسمبلی اور مختلف مذاہب و مکاتب فکر کے نمائندے بڑی تعداد میں شریک ہوئے۔
شرکاء نے اس موقع پر آپریشن “بنیان المرصوص” کی کامیابی کو ملک میں امن و استحکام کی جانب ایک اہم پیش رفت قرار دیا۔ مختلف مذاہب کے رہنماؤں نے قومی اتحاد، ہم آہنگی اور قیام امن کے لیے دعا اور نیک خواہشات کا اظہار کیا۔ وزیر اعلیٰ میر سرفراز بگٹی نے اپنے خطاب میں کہا کہ صوبائی حکومت عملی اقدامات کے ذریعے اقلیتوں کے مسائل حل کرنے کے لیے پرعزم ہے۔ انہوں نے اعلان کیا کہ ایک خصوصی کمیٹی تشکیل دی جائے گی جو اقلیتوں کے مسائل کے حل کے لیے فوری اقدامات کرے گی۔ ساتھ ہی یہ بھی کہا گیا کہ صوبے کی مذہبی عبادت گاہوں پر اگر کسی نے ناجائز قبضہ کیا ہے تو اسے 24 گھنٹوں میں ختم کر کے متعلقہ کمیونٹی کو واپس دلایا جائے گا۔
گورنر بلوچستان شیخ جعفر خان مندوخیل نے اس موقع پر کہا کہ امن و ترقی قومی یکجہتی کے بغیر ممکن نہیں اور حکومت اس مقصد کے لیے ہر سطح پر اقدامات کر رہی ہے۔ سیمینار کے شرکاء نے اس عمل کو خوش آئند قرار دیا اور کہا کہ ایسے پروگرام معاشرتی ہم آہنگی کو فروغ دیتے ہیں، دہشت گردی اور انتہا پسندی کے خلاف ایک مثبت بیانیہ تشکیل پاتا ہے اور معاشرے میں امن کو یقینی بنایا جا سکتا ہے۔
تقریب کے آخر میں شرکاء نے اس عزم کا اظہار کیا کہ ملک میں رواداری، بھائی چارہ اور یکجہتی کے پیغام کو مزید عام کیا جائے گا تاکہ ایک پرامن اور مستحکم معاشرہ قائم ہو سکے۔
Leave a Reply