وزیراعلیٰ بلوچستان میر سرفراز بگٹی کی قیادت میں منعقدہ سیکرٹریز کمیٹی کے اجلاس میں صوبائی وزراء میر ظہور احمد بلیدی، میر سلیم خان کھوسہ اور میر شعیب نوشیروانی نے شرکت کی۔ اجلاس میں چیف سیکرٹری بلوچستان شکیل قادر خان، ایڈیشنل چیف سیکرٹری ترقیات زاہد سلیم، ایڈیشنل چیف سیکرٹری داخلہ حمزہ شفقات، پرنسپل سیکرٹری بابر خان سمیت تمام محکموں کے انتظامی سیکرٹریز بھی موجود تھے۔
اجلاس کے دوران مختلف محکموں میں جاری منصوبوں کی پیش رفت کا تفصیلی جائزہ لیا گیا۔ وزیراعلیٰ نے بلوچستان کی سمندری حدود میں غیر قانونی ٹرالنگ پر سخت تشویش کا اظہار کرتے ہوئے محکمہ فشریز کو ہدایت کی کہ اس غیر قانونی عمل کا ہر صورت خاتمہ کیا جائے کیونکہ یہ مقامی ماہی گیروں اور عوام کے ساتھ ناانصافی ہے۔
وزیراعلیٰ نے واضح کیا کہ تمام محکمے ترقیاتی منصوبوں کی شفافیت، معیار اور بروقت تکمیل کے ذمہ دار ہیں۔ انہوں نے ہدایت دی کہ سو فیصد فنڈز رکھنے والی چھوٹی اسکیموں کو یکم جنوری تک مکمل کیا جائے اور مختص فنڈز کا شفاف و بروقت استعمال یقینی بنایا جائے۔ ان کا کہنا تھا کہ ترقیاتی منصوبوں میں معیار پر کوئی سمجھوتہ نہیں کیا جائے گا اور عوامی مفاد کے تمام منصوبے مقررہ مدت میں مکمل ہونا ضروری ہیں۔
وزیراعلیٰ میر سرفراز بگٹی نے کہا کہ اداروں کی کارکردگی جانچنے کے لیے مربوط مانیٹرنگ اینڈ ایویلیوشن سسٹم تشکیل دینا ناگزیر ہے اور فنڈز کے استعمال کے ساتھ ساتھ منصوبوں کی تکمیل سے متعلق ماہانہ رپورٹ پیش کی جائے۔ انہوں نے خبردار کیا کہ تاخیر یا غفلت برتنے والے افسران کے خلاف کارروائی ہوگی۔ ان کا کہنا تھا کہ شفافیت، تیز رفتاری اور جوابدہی حکومت کی اولین ترجیح ہے اور صوبے کے وسائل عوامی خدمت کے لیے استعمال میں لائے جا رہے ہیں۔
انہوں نے بلوچستان بورڈ آف انٹرمیڈیٹ اینڈ سیکنڈری ایجوکیشن میں اصلاحات کا عمل آگے بڑھانے اور ادارے کو شفافیت اور میرٹ کی بنیاد پر مثالی ادارہ بنانے کی ہدایت کی۔ اجلاس میں فیصلہ ہوا کہ آئندہ اجلاس میں فارن فنڈڈ اور وفاقی منصوبوں کی پیش رفت کا بھی جائزہ لیا جائے گا۔
وزیراعلیٰ نے مزید کہا کہ ترقیاتی منصوبوں کے لیے کانسپٹ پیپرز کا تصور ختم کر دیا گیا ہے اور اب ہر منصوبہ قابل عمل پی سی ون کے ذریعے ہی منظوری کے لیے پیش ہوگا۔ انہوں نے ہدایت کی کہ مالی سال کے نئے بجٹ سے تین ماہ قبل منصوبوں کی محکمانہ منظوری کو یقینی بنایا جائے تاکہ ترقیاتی عمل میں تاخیر نہ ہو اور عوامی فلاح و بہبود کے منصوبے بروقت مکمل ہوں۔
Leave a Reply