کوئٹہ میں ڈی آئی جی پولیس اور صوبائی حکومت کے ترجمان نے ایک مشترکہ پریس کانفرنس کے دوران بتایا کہ مغوی مصور خان کے اغواء میں ملوث ایک اہم ملزم یونس پولیس مقابلے میں مارا گیا ہے۔ حکام کے مطابق یہ ایک منظم کارروائی کا نتیجہ ہے جس کے دوران دیگر ملزمان کی تلاش اور گرفتاری کے لئے بھی کوششیں جاری ہیں۔
ترجمان بلوچستان حکومت اعتزاز گورایا نے مزید بتایا کہ اغواء میں ملوث طیب شاہ نامی شخص کا تعلق باجوڑ سے ہے، جبکہ ایک اور مرکزی ملزم ہشام کو گرفتار کرلیا گیا ہے اور وہ اس وقت ریمانڈ پر ہے۔ اغواء میں استعمال ہونے والی گاڑی بھی بازیاب کر لی گئی ہے جس سے تفتیش میں مزید مدد ملے گی۔
پولیس حکام کے مطابق مختلف مقامات پر چھاپے مارے جا رہے ہیں تاکہ دیگر ملوث افراد کو بھی قانون کے کٹہرے میں لایا جا سکے۔ اعتزاز گورایا نے مصور خان کی شہادت پر شدید افسوس کا اظہار کرتے ہوئے کہا کہ یہ ایک ناقابل تلافی نقصان ہے اور ان کے اہل خانہ کے غم میں پورا صوبہ شریک ہے۔
پریس کانفرنس میں اس عزم کا اظہار کیا گیا کہ انصاف کی فراہمی یقینی بنائی جائے گی اور مجرمان کو کسی صورت معاف نہیں کیا جائے گا۔
Leave a Reply