حکومت بلوچستان نے سرکاری وسائل کے ناجائز استعمال پر فوری کارروائی کرتے ہوئے ایک ذمہ دار افسر کو عہدے سے ہٹا دیا ہے۔ ترجمان بلوچستان حکومت شاہد رند کے مطابق، ایک سرکاری گاڑی کے خلاف قانون استعمال کا معاملہ سامنے آنے پر چیف سیکرٹری بلوچستان کی جانب سے فوری ایکشن لیا گیا اور متعلقہ افسر کو برطرف کر دیا گیا۔ اس واقعے کی شفاف تحقیقات کا حکم دے دیا گیا ہے تاکہ ذمہ داروں کا مکمل تعین کیا جا سکے اور انہیں قانون کے مطابق جوابدہ بنایا جا سکے۔
ترجمان نے واضح کیا کہ عوامی وسائل کا بے جا اور غلط استعمال کسی صورت برداشت نہیں کیا جائے گا اور ایسے معاملات میں زیرو ٹالرنس کی پالیسی پر سختی سے عمل ہو رہا ہے۔ ان کا کہنا تھا کہ قانون سب کے لیے برابر ہے اور اختیارات کے غلط استعمال پر بلاامتیاز کارروائی کی جائے گی۔ ترجمان کے مطابق حکومت اس بات کو یقینی بنا رہی ہے کہ سرکاری مشینری عوامی خدمت کے لیے ایمانداری سے استعمال ہو۔
اس سلسلے میں سخت اقدامات اٹھائے جا رہے ہیں تاکہ شفاف حکمرانی اور مؤثر جوابدہی کو فروغ دیا جا سکے۔ ترجمان نے مزید کہا کہ یہ عمل حکومت کی اس پالیسی کا حصہ ہے جو اچھی حکمرانی، قانون کی بالادستی اور عوامی اعتماد کی بحالی پر مبنی ہے۔ حکومت کی اولین ترجیح یہ ہے کہ وسائل کا درست استعمال ہو اور نظام کو کرپشن سے پاک رکھا جائے۔
Leave a Reply