وزیر اعلیٰ بلوچستان میر سرفراز بگٹی سے نیشنل پارٹی کے سربراہ اور سابق وزیر اعلیٰ ڈاکٹر عبدالمالک بلوچ نے ملاقات کی، جس میں صوبے کی مجموعی سیاسی و سماجی صورتحال اور عوامی مسائل پر تفصیلی گفتگو ہوئی۔ اس ملاقات میں بلوچستان کی ترقی، عوامی فلاح و بہبود، اور جاری و مجوزہ ترقیاتی منصوبوں پر تبادلہ خیال کیا گیا۔
ملاقات کے دوران دونوں رہنماؤں نے اس بات پر اتفاق کیا کہ بلوچستان کی ترقی صرف حکومت کا نہیں بلکہ تمام سیاسی جماعتوں کی مشترکہ ذمہ داری ہے، اور اس کے لیے سیاسی ہم آہنگی اور جمہوری اقدار کا فروغ ناگزیر ہے۔ وزیر اعلیٰ نے اس موقع پر کہا کہ سیاسی اختلافات سے بالاتر ہو کر عوام کی خدمت ہی ہمارا اصل ہدف ہے۔
انہوں نے کہا کہ جمہوریت کا حسن منتخب نمائندوں سے مشاورت میں ہے، اور تمام اسٹیک ہولڈرز کی رائے کو اہمیت دینا صوبے کی بہتر حکمرانی کا ضامن ہے۔ وزیر اعلیٰ نے اس بات پر زور دیا کہ ترقی، مفاہمت اور شراکتِ عمل سے ہی بلوچستان کے عوام کا مستقبل روشن اور محفوظ بنایا جا سکتا ہے۔
دونوں رہنماؤں نے اس عزم کا اعادہ کیا کہ سیاسی استحکام، عوامی شرکت، اور باہمی مشاورت ہی صوبے میں دیرپا ترقی اور امن کا راستہ ہے۔
Leave a Reply