کوئٹہ میں وزیراعلیٰ بلوچستان میر سرفراز بگٹی کی زیر صدارت آئندہ مالی سال 2025-26 کے بجٹ اور پبلک سیکٹر ڈویلپمنٹ پروگرام (پی ایس ڈی پی) کی تیاری سے متعلق پارلیمانی کمیٹی کا اہم اجلاس منعقد ہوا۔ اجلاس میں مختلف سیاسی جماعتوں بشمول پاکستان پیپلز پارٹی، پاکستان مسلم لیگ، عوامی نیشنل پارٹی، جماعت اسلامی اور بلوچستان عوامی پارٹی کے پارلیمانی لیڈرز اور اراکین اسمبلی نے شرکت کی۔ وزیراعلیٰ نے بجٹ کی تیاری میں تمام جماعتوں کو اعتماد میں لینے کے عزم کا اعادہ کیا جسے شرکاء نے جمہوریت کے فروغ کے لیے مثبت قدم قرار دیا۔
اجلاس کے دوران آئندہ بجٹ کے خدوخال اور ترقیاتی منصوبوں پر تفصیلی غور کیا گیا اور اس بات پر اتفاق کیا گیا کہ بجٹ عوامی ضروریات، پسماندہ علاقوں کی ترقی، تعلیم، صحت، انفراسٹرکچر اور روزگار کے مواقع کو مدنظر رکھتے ہوئے تشکیل دیا جائے گا۔ وزیراعلیٰ سرفراز بگٹی نے واضح کیا کہ تمام اضلاع کی مساوی ترقی حکومت کی اولین ترجیح ہے اور وسائل کی منصفانہ تقسیم کے لیے ہر علاقے کی حقیقی ضروریات کو سامنے رکھا جائے گا۔ انہوں نے کہا کہ مجوزہ منصوبوں کی مکمل فنڈنگ کو یقینی بنایا جائے گا تاکہ ترقیاتی عمل میں کوئی رکاوٹ نہ آئے اور ہر ضلع کو یکساں ترقی کے مواقع میسر آئیں۔
شرکاء نے اس بات پر اطمینان کا اظہار کیا کہ بجٹ کی تیاری کا عمل شفاف، جامع اور مشاورتی اصولوں پر مبنی ہے۔ اس مشاورت کا نتیجہ ایک ایسا بجٹ ہوگا جو نہ صرف عوامی توقعات کا ترجمان ہوگا بلکہ بلوچستان کی معیشت کو بھی استحکام بخشے گا۔ اجلاس کے اختتام پر تمام پارلیمانی نمائندوں نے وزیراعلیٰ کی قیادت میں جاری مشاورتی عمل پر اعتماد کا اظہار کرتے ہوئے آئندہ بجٹ کو صوبے کی ترقی اور عوامی فلاح کا سنگ میل قرار دیا۔
Leave a Reply