وزیر اعلیٰ بلوچستان میر سرفراز بگٹی کی زیر صدارت بلوچستان ایوی ایشن ونگ کا جائزہ اجلاس منعقد ہوا، جس میں ڈائریکٹر جنرل ایوی ایشن ونگ بلوچستان کیپٹن علی آزاد نے اجلاس کو تفصیلی بریفنگ دی۔ اجلاس میں بلوچستان ایوی ایشن ونگ کی تنظیم نو اور فعالیت کا فیصلہ کیا گیا، جبکہ وزیر اعلیٰ نے بنیادی ڈھانچے کو مزید مستحکم کرنے کے لیے جامع روڈ میپ تیار کرنے کی ہدایت کی۔ اس موقع پر فیصلہ کیا گیا کہ ایوی ایشن ونگ کو نہ صرف وی آئی پی موومنٹ بلکہ ہنگامی صورتحال، ریسکیو اور ایمرجنسی سروسز کے لیے بھی زیر استعمال لایا جائے گا۔
وزیر اعلیٰ بلوچستان نے کہا کہ حکومت ایوی ایشن ونگ کو جدید تقاضوں کے مطابق فعال بنانے کے لیے تمام وسائل بروئے کار لائے گی۔ انہوں نے ینگ پائلٹس ٹریننگ پروگرام کو بلوچستان کے نوجوانوں کے لیے غیر معمولی اہمیت کا حامل قرار دیتے ہوئے کہا کہ ایک منظم طریقہ کار کے تحت پائلٹس کی تربیت دی جائے گی اور ملازمت کے مواقع پیدا کیے جائیں گے، تاکہ بلوچستان کے نوجوان عالمی معیار کی ہوا بازی کی مہارت حاصل کر سکیں۔ انہوں نے مزید کہا کہ ایوی ایشن ونگ کو نہ صرف بلوچستان بلکہ پورے پاکستان کے لیے ایک ماڈل ایوی ایشن ونگ کے طور پر تیار کیا جائے گا، جو ہوا بازی کے فروغ، ہنگامی صورتحال، ریسکیو سروسز اور عوامی فلاح کے منصوبوں میں بھی کلیدی کردار ادا کرے گا۔
اجلاس میں چیف سیکرٹری بلوچستان شکیل قادر خان، پرنسپل سیکرٹری بابر خان، سیکرٹری خزانہ عمران زرکون، ایڈیشنل سیکرٹری چیف منسٹر سیکرٹریٹ محمد فریدون سمیت دیگر اعلیٰ حکام نے شرکت کی۔
Leave a Reply