ڈیرہ مراد جمالی میں ایف سی بلوچستان نارتھ کے زیرِ اہتمام ضلع نصیر آباد میں ایک باوقار اور نمائندہ گرینڈ جرگے کا انعقاد کیا گیا، جس میں صوبے اور خطے کی اعلیٰ قیادت کے ساتھ ساتھ بڑی تعداد میں قبائلی عمائدین نے شرکت کی۔ اس موقع پر گورنر بلوچستان، وزیر اعلیٰ بلوچستان، کور کمانڈر 12 کور، آئی جی ایف سی بلوچستان نارتھ، آئی جی پولیس اور نصیر آباد ڈویژن کے انتظامی افسران موجود تھے۔
جرگے کے دوران علاقے کی مجموعی سلامتی، قبائلی ہم آہنگی، باہمی روابط اور ترقیاتی ضروریات پر تفصیلی تبادلۂ خیال کیا گیا۔ شرکاء نے اس بات پر اتفاق کیا کہ پائیدار امن کے قیام کے لیے ریاستی اداروں اور مقامی آبادی کے درمیان اعتماد اور تعاون نہایت اہم ہے۔ قبائلی عمائدین نے پاک فوج اور فرنٹیئر کور بلوچستان نارتھ کی جانب سے امن کی بحالی اور تحفظ کے لیے کی گئی عملی کاوشوں کو سراہتے ہوئے ان کی قربانیوں کو خراجِ تحسین پیش کیا۔
گورنر بلوچستان نے اپنے خطاب میں کہا کہ قبائلی عوام ہمیشہ ریاست کے ساتھ کھڑے رہے ہیں اور آج بھی امن و ترقی کے سفر میں ان کا کردار کلیدی حیثیت رکھتا ہے۔ انہوں نے اس امر پر زور دیا کہ نوجوانوں کے بہتر مستقبل، ترقیاتی منصوبوں کی کامیابی اور دیرپا استحکام کے لیے مشترکہ حکمت عملی اپنانا وقت کی ضرورت ہے۔
وزیر اعلیٰ بلوچستان نے کہا کہ پاک فوج اور فرنٹیئر کور خطے میں امن، سماجی استحکام اور بنیادی سہولیات کی فراہمی کے لیے اپنی ذمہ داریاں پوری کرتی رہیں گی، جبکہ امن کو برقرار رکھنے میں قبائلی عمائدین کی شراکت انتہائی اہم ہے۔ کور کمانڈر 12 کور نے اس موقع پر کہا کہ بلوچستان کی ترقی اور خوشحالی امن اور اتحاد سے جڑی ہوئی ہے، اور عوام کے تعاون سے دہشت گرد عناصر کے عزائم کو ناکام بنایا جا سکتا ہے۔
جرگے کے اختتام پر قبائلی عمائدین نے حکومت بلوچستان، پاک فوج اور فرنٹیئر کور کی امن کے لیے کی گئی کوششوں کو خوش آئند قرار دیا، بالخصوص کوہان سروے پراجیکٹ اور این 65 شاہراہ کی سیکیورٹی کے اقدامات کو سراہا۔ انہوں نے اس عزم کا اعادہ کیا کہ وہ علاقائی امن، سماجی اتحاد اور ترقی کے عمل میں ریاستی اداروں کے ساتھ بھرپور تعاون جاری رکھیں گے۔
Leave a Reply