وزیر اعلیٰ بلوچستان میر سرفراز بگٹی نے چیف منسٹر سیکرٹریٹ میں صوبے کے دور دراز علاقوں سے آئے عوامی وفود اور شہریوں سے ملاقات کی، جہاں لوگوں نے اپنے مسائل اور مشکلات سے آگاہ کیا اور تحریری درخواستیں بھی پیش کیں۔ وزیر اعلیٰ نے ان مسائل کو توجہ سے سنا اور موقع پر ہی متعلقہ حکام کو فوری کارروائی کی ہدایات دیں۔ اس موقع پر انہوں نے واضح کیا کہ حکومت کی پالیسی یہی ہے کہ عوام کو اپنے مسائل کے حل کے لیے کوئٹہ آنے کی ضرورت نہ پڑے بلکہ سہولتیں ضلعی سطح پر فراہم کی جائیں۔ اسی مقصد کے لیے ضلعی انتظامیہ اور مقامی اداروں کو زیادہ فعال اور جواب دہ بنایا جا رہا ہے تاکہ عوام کو ان کی دہلیز پر ریلیف مل سکے۔
وزیر اعلیٰ نے کہا کہ اچھی طرزِ حکمرانی صرف منصوبہ بندی تک محدود نہیں بلکہ عملی اقدامات سے ہی ممکن ہے۔ ضلعی حکام کو ہدایت دی گئی ہے کہ عوامی شکایات کو ترجیحی بنیادوں پر حل کریں اور شفافیت و تیز رفتاری کو یقینی بنائیں۔ انہوں نے یہ بھی واضح کیا کہ عوامی خدمت میں غفلت یا لاپرواہی برداشت نہیں کی جائے گی۔ میر سرفراز بگٹی نے کہا کہ حقیقی عوامی خدمت یہی ہے کہ سہولتیں براہِ راست عوام تک پہنچائی جائیں اور یہی حکومت کا بنیادی مقصد ہے۔ ان کا کہنا تھا کہ بلوچستان حکومت عوامی مسائل کا پائیدار اور مستقل حل فراہم کرنے کے لیے پرعزم ہے، تاکہ شفاف طرزِ حکمرانی، وسائل کی منصفانہ تقسیم اور اداروں کی فعالیت کے ذریعے ایک مؤثر اور خدمت گزار حکومت کا عملی تصور سامنے آ سکے۔
Leave a Reply