صوبائی کابینہ کے اہم فیصلے، عوامی فلاح اور گڈ گورننس پر توجہ

وزیر اعلیٰ بلوچستان میر سرفراز بگٹی کی زیر صدارت صوبائی کابینہ کا اکیسواں اجلاس چیف منسٹر سیکرٹریٹ میں منعقد ہوا، جس میں صوبے کی معاشی، سماجی اور انتظامی بہتری سے متعلق کئی اہم فیصلے کیے گئے۔ اجلاس کے آغاز میں کابینہ نے وزیر اعظم پاکستان محمد شہباز شریف کی جانب سے بلوچستان میں مواصلاتی اور تعلیمی منصوبوں کے آغاز پر اظہارِ تشکر کیا اور ان اقدامات کو صوبے کی ترقی کے لیے مثبت پیش رفت قرار دیا۔
اجلاس میں عوام کو براہِ راست ریلیف فراہم کرنے کے لیے الیکٹرک بائیکس اسکیم متعارف کرانے کا فیصلہ کیا گیا۔ اس اسکیم کے تحت طلبہ، ورکنگ ویمن اور سرکاری ملازمین کو 30 فیصد سبسڈی پر الیکٹرک بائیکس فراہم کی جائیں گی، جبکہ عام شہریوں کو بھی آسان اقساط کے ذریعے اس سہولت سے فائدہ اٹھانے کا موقع ملے گا۔ کابینہ نے اس امر پر اتفاق کیا کہ اسکیم پر عملدرآمد بینک فنانسنگ کے ذریعے کیا جائے گا تاکہ زیادہ سے زیادہ افراد مستفید ہو سکیں۔
اجلاس کے دوران بتایا گیا کہ صوبے میں تقریباً ڈھائی لاکھ سرکاری ملازمین کے علاج معالجے پر سالانہ اربوں روپے خرچ ہو رہے ہیں۔ اس پس منظر میں صوبائی کابینہ نے سرکاری ملازمین کے لیے ایک جامع ہیلتھ انشورنس اسکیم متعارف کرانے کی منظوری دی، جس کا مقصد علاج معالجے کے نظام کو شفاف، مؤثر اور پائیدار بنانا ہے۔ اس کے ساتھ ساتھ علاج کی غرض سے پیشگی میڈیکل ادائیگیوں اور عوامی انڈومنٹ فنڈ کے آڈٹ کی بھی منظوری دی گئی۔
نوجوانوں کو معاشی خودمختاری کی جانب گامزن کرنے کے لیے انٹرپرائزز ڈویلپمنٹ پروگرام کی توسیع کی منظوری بھی دی گئی، جس کے تحت یہ پروگرام اب گوادر، کیچ اور آواران تک پھیلایا جائے گا۔ اجلاس میں گڈ گورننس کے فروغ کے لیے میرٹ کی بنیاد پر تقرریوں پر زور دیا گیا اور اس عزم کا اعادہ کیا گیا کہ میرٹ پر کسی قسم کا سمجھوتہ نہیں کیا جائے گا۔
اجلاس سے خطاب کرتے ہوئے وزیر اعلیٰ بلوچستان میر سرفراز بگٹی نے کہا کہ بلوچستان کے لیے مواصلاتی اور تعلیمی منصوبوں میں تعاون پر وزیر اعظم پاکستان کے شکر گزار ہیں، جن کی تکمیل سے نہ صرف مواصلاتی نیٹ ورک بہتر ہوگا بلکہ مقامی سطح پر معیاری تعلیم کے مواقع بھی بڑھیں گے۔ انہوں نے کہا کہ الیکٹرک بائیکس اسکیم کے ذریعے زندگی کے مختلف شعبوں سے تعلق رکھنے والے افراد کو آسان اقساط پر سہولت فراہم کی جائے گی۔
وزیر اعلیٰ نے واضح کیا کہ عوام کے ٹیکس سے حاصل ہونے والے وسائل عوام کی امانت ہیں اور ان کا منصفانہ اور درست استعمال حکومت کی اولین ذمہ داری ہے۔ انہوں نے کہا کہ سرکاری ملازمین کے لیے جامع ہیلتھ انشورنس اسکیم اور نوجوانوں کے لیے معاشی مواقع حکومت کی عوام دوست پالیسیوں کا تسلسل ہیں۔ میر سرفراز بگٹی نے اس بات پر زور دیا کہ گڈ گورننس کا قیام میرٹ کے بغیر ممکن نہیں، اور صوبائی حکومت ہر صورت میرٹ کے نفاذ کو یقینی بنائے گی۔