کوئٹہ میں منعقدہ سلطان گولڈن گنیز ریکارڈ اٹمپٹ ایونٹ 2025 کی تقریب سے خطاب کرتے ہوئے وزیر اعلیٰ بلوچستان میر سرفراز بگٹی نے کہا کہ بلوچستان کے نوجوان غیر معمولی صلاحیتوں کے حامل ہیں اور اگر انہیں درست مواقع اور سرپرستی فراہم کی جائے تو وہ قومی ہی نہیں بلکہ عالمی سطح پر بھی اپنی پہچان بنا سکتے ہیں۔ انہوں نے کہا کہ صوبائی حکومت نوجوانوں کی مثبت سرگرمیوں اور کھیلوں کے فروغ کے لیے عملی اقدامات کر رہی ہے تاکہ باصلاحیت افراد کو آگے بڑھنے کے مساوی مواقع میسر آ سکیں۔
وزیر اعلیٰ نے سلطان گولڈن کی کامیابی کو پورے صوبے کے لیے باعثِ فخر قرار دیتے ہوئے کہا کہ گنیز ورلڈ ریکارڈ قائم کر کے انہوں نے نہ صرف بلوچستان بلکہ پاکستان کا نام بھی دنیا بھر میں روشن کیا ہے۔ انہوں نے سلطان گولڈن کی محنت، لگن اور عزم کو سراہتے ہوئے ان کے لیے پانچ کروڑ روپے انعام کا اعلان کیا اور کہا کہ ایسی کامیابیاں نوجوان نسل کے لیے حوصلہ افزا مثال بنتی ہیں۔
میر سرفراز بگٹی نے کہا کہ بلوچستان میں ٹیلنٹ کی کمی نہیں، اصل ضرورت مواقع فراہم کرنے کی ہے، اور صوبائی حکومت اس حوالے سے اپنی ذمہ داری پوری کر رہی ہے۔ انہوں نے یقین دلایا کہ صوبے کے کھلاڑیوں اور نوجوان ٹیلنٹ کو بہتر سہولیات دی جائیں گی تاکہ وہ عالمی سطح پر ملک اور صوبے کی نمائندگی کر سکیں۔ آخر میں وزیر اعلیٰ نے سلطان گولڈن کو شاندار کامیابی پر مبارکباد دیتے ہوئے کہا کہ ان کی کامیابی بلوچستان کے نوجوانوں کے لیے ایک روشن راستہ ہے۔
Leave a Reply