خضدار میں پاکستان پیپلز پارٹی کے رہنما آغا شکیل درانی کی رہائش گاہ پر دستی بم حملے کے واقعے نے صوبے بھر میں تشویش اور افسوس کی لہر دوڑا دی ہے۔ وزیر اعلیٰ بلوچستان میر سرفراز بگٹی نے اس واقعے کی شدید مذمت کرتے ہوئے کہا ہے کہ اس طرح کے بزدلانہ حملے عوام اور سیاسی قیادت کے حوصلے کمزور نہیں کر سکتے۔ ان کا کہنا تھا کہ حکومت ہر قیمت پر شہریوں کے جان و مال کے تحفظ کو یقینی بنانے کے لئے پرعزم ہے اور دہشت گردی کی کسی بھی صورت اجازت نہیں دی جا سکتی۔
وزیر اعلیٰ نے زخمیوں کی جلد صحتیابی کے لیے نیک تمناؤں کا اظہار کیا اور واضح کیا کہ واقعے کی تحقیقات فوری طور پر شروع کر دی گئی ہیں۔ انہوں نے عزم ظاہر کیا کہ ملوث عناصر کو ہر حال میں قانون کے کٹہرے میں لایا جائے گا تاکہ ایسے عناصر کو صوبے کے امن اور سکون کو خراب کرنے کا موقع نہ ملے۔
میر سرفراز بگٹی نے کہا کہ بلوچستان کے عوام دہشت گردی کے خلاف متحد ہیں اور صوبائی حکومت اس جدوجہد میں ان کے ساتھ کھڑی ہے۔ انہوں نے مزید کہا کہ ایسے واقعات عوام کے حوصلے توڑنے کے بجائے مزید مضبوطی کا باعث بنتے ہیں، اور بلوچستان میں امن و ترقی کے سفر کو کسی صورت روکنے نہیں دیا جائے گا۔
Leave a Reply