کوئٹہ میں وزیر اعلیٰ بلوچستان میر سرفراز بگٹی کی زیر صدارت ہونے والے صوبائی کابینہ کے اجلاس میں عوامی فلاح و بہبود کے مختلف منصوبوں کی منظوری دی گئی۔ اجلاس میں تمام محکموں میں خالی آسامیوں پر بھرتی کے ساتھ ساتھ گرین ٹریکٹر اسکیم جیسے اہم اقدامات کو حتمی شکل دی گئی۔ کابینہ نے فیصلہ کیا کہ کچھ غیر فعال دیہی طبی مراکز کو پاک فوج کی مدد سے فعال کیا جائے گا تاکہ دیہی علاقوں میں بنیادی طبی سہولیات کی فراہمی ممکن بنائی جا سکے۔
کسانوں کو معاشی سہولت دینے کے لیے کابینہ نے زرعی ٹریکٹر پچاس فیصد سبسڈی کے ساتھ فراہم کرنے کی منظوری دی۔ اس کے علاوہ، زرعی شعبے سے وابستہ ٹرینڈ کراپ رپورٹرز کو گریڈ 6 سے گریڈ 11 میں ترقی دینے کی توثیق بھی کی گئی۔ توانائی کے شعبے میں بہتری کے لیے لسبیلہ اور حب میں 150 کلو واٹ کے سولر پروجیکٹس کا جائزہ لینے کے لیے ایک اعلیٰ سطحی کمیٹی تشکیل دی گئی ہے۔
بلوچستان منرل ڈویلپمنٹ فنڈ کے قیام کی منظوری بھی دی گئی جو صوبے کے معدنی وسائل کے بہتر اور شفاف استعمال کے لیے اہم کردار ادا کرے گا۔ سرکاری ملازمین کے لیے پائیدار پنشن نظام کو یقینی بنانے کے لیے بلوچستان کنٹری بیوشن پینشن اسکیم رولز 2025 کی منظوری دی گئی تاکہ غیر ترقیاتی اخراجات پر قابو پایا جا سکے۔
تعلیم کے میدان میں ڈیجیٹل سہولیات کے فروغ کے لیے لیپ ٹاپ پالیسی کو مؤثر بنانے کا فیصلہ کیا گیا۔ ساتھ ہی، مکران اور کیچ کے انٹرنی اساتذہ کی ایڈجسٹمنٹ اور تمام محکموں میں خالی آسامیوں پر بھرتی کی منظوری دے کر روزگار کے مواقع بڑھانے پر زور دیا گیا ہے۔
امن و امان کے سلسلے میں کوہلو میں دو نئے پولیس اسٹیشنز، مانگی ڈیم کے لیے سیکیورٹی اقدامات، اور سی ٹی ڈی تھانوں کے قیام کی منظوری دی گئی۔ اسلحہ لائسنس رولز میں ترامیم کے تحت مفت استثنیٰ ختم کر دیا گیا ہے، جب کہ وزراء، مشیروں اور اراکین اسمبلی کے لیے سیکیورٹی پالیسی کو مزید مضبوط بنایا گیا ہے۔
خواتین کے حقوق کے فروغ کے لیے بلوچستان کمیشن آن اسٹیٹ آف ویمن کی چیئرپرسن کے طور پر کرن بلوچ کی تقرری کی منظوری دی گئی۔ صحافیوں کی فلاح و بہبود سے متعلق جرنلسٹس ویلفیئر ترمیمی رولز اور محکمہ ایکسائز اینڈ ٹیکسیشن کے نئے رولز بھی منظور کر لیے گئے۔
کابینہ کے ان فیصلوں سے ظاہر ہوتا ہے کہ وزیر اعلیٰ میر سرفراز بگٹی کا ویژن ایک محفوظ، ترقی یافتہ اور بااختیار بلوچستان کے قیام پر مرکوز ہے، جہاں شفافیت، میرٹ اور عوامی خدمت کو ترجیح دی جا رہی ہے۔ ان اقدامات کے مثبت اثرات جلد عوام تک پہنچنا شروع ہو جائیں گے۔
Leave a Reply