کوئٹہ میں اقلیتوں کی فلاح و بہبود کے سلسلے میں ایک اہم پیش رفت سامنے آئی ہے، جہاں حکومت بلوچستان نے اقلیتوں کی سماجی اور معاشی ترقی کو مدنظر رکھتے ہوئے پیپلز مینارٹی کارڈ متعارف کرانے کا فیصلہ کیا ہے۔ اس اقدام کا مقصد صوبے میں بسنے والی اقلیتی برادریوں کو صحت، تعلیم، روزگار اور کاروبار کے مواقع میں سہولت فراہم کرنا ہے۔
وزیراعلیٰ بلوچستان میر سرفراز بگٹی کی زیرصدارت منعقدہ مشاورتی اجلاس میں پارلیمانی سیکرٹری برائے اقلیتی امور سنجے کمار، چیف سیکرٹری شکیل قادر خان، پرنسپل سیکرٹری اور دیگر متعلقہ حکام شریک ہوئے۔ اجلاس میں فیصلہ کیا گیا کہ اس پروگرام کے مؤثر نفاذ کیلئے موجودہ مالی سال کے دوران مینارٹی انڈومنٹ فنڈ کیلئے 50 کروڑ روپے مختص کیے جائیں گے، جبکہ آئندہ مالی سال میں اس بجٹ کو بڑھا کر ایک ارب روپے تک لے جانے کی منصوبہ بندی کی گئی ہے۔
وزیراعلیٰ سرفراز بگٹی نے کہا کہ حکومت بلوچستان اقلیتوں کے حقوق کے تحفظ اور ان کی ترقی کو اپنی اولین ترجیحات میں شامل رکھتی ہے۔ انہوں نے اس امید کا اظہار کیا کہ پیپلز مینارٹی کارڈ کے ذریعے اقلیتوں کو بہتر سہولیات میسر آئیں گی اور انہیں صوبے کے ترقیاتی عمل میں برابر کے مواقع حاصل ہوں گے۔
Leave a Reply